Беларускі дзяржаўны акадэмічны заслужаны харэаргафічны ансамбль «Харошкі» — жывая легенда беларусаў. Калектыў быў створаны ў 1974 годзе. Ужо праз тры гады пасля свайго заснавання ансамбль заняў першае месца на конкурсе сярод прафесійных харэаграфічных калектываў СССР. Назва «Харошкі» паходзіць ад назвы беларускай вёскі Харашкі ў Магілёўскай вобласці. Менавіта ў Харашках быў запісаны самы першы танец — «Гусарыкі», які і зараз захаваўся ў рэпертуары калектыву.
На працягу сваёй гісторыі ансамбль «Харошкі» спрыяе захаванню шматвяковых нацыянальных традыцый і папулярызуе беларускае мастацтва. Аснова рэпертуару калектыву кампазіцыі, заснаваныя на беларускім фальклоры і гісторыі. Яны найлепшым чынам раскрываюць унікальнасць, самабытнасць беларускага народа, яго традыцыі і багатыя духоўныя каштоўнасці.
Ансамбль «Харошкі» аб’ядноўвае харэаграфічную і вакальна-інструментальную групы. Беларуская музыка ў жывым выкананні, мілыя сэрцу лірычныя песні недзвычай упрыгожваюць канцэрты калектыву.
Сцэнічныя касцюмы ансамбля «Харошкі» з’яўляюцца ўнікальнымі, маюць мастацкую і этнаграфічную каштоўнасць. Кожны эскіз з’явіўся ў выніку сур’ёзнага даследавання гісторыі. Большасць касцюмаў упрыгожаны элементамі ручной працы: вышыўкай, ткацтвам, пляценнем. Сцэнічныя касцюмы не аднойчы экспанаваліся на прэстыжных выстаўках і заўсёды атрымлівалі высокую ацэнку спецыялістаў.
На працягу сваёй творчасці ансамбль «Харошкі» наведаў больш за 50 краін свету: 10 краін Усходу, краiны Еўропы, Паўднёвай і Паўночнай Амерыкі. Калектыў з’яўляецца сапраўдным нацыянальным брэндам і візітоўкай Беларусі. «Харошкі» ўсюды прымаюць з цеплынёй і захапленнем, бо мова харэаграфіі адзіная і зразумелая на ўсіх кантынентах.
Сваёй славутай гісторыяй ансамбль «Харошкі» абавязаны стваральніку калектыву і яго нязменнаму мастацкаму кіраўніку, лаўрэату Дзяржаўнай прэміі Рэспублікі Беларусь, народнай артыстцы Беларусі Валянціне Гаявой. Гэта таленавіты харэограф з бездакорным мастацкім густам. У рэпертуар ансамбля «Харошкі» ўваходзіць больш за 70 харэаграфічных пастановак Валянціны Гаявой, сабраных у выдатныя тэатралізаваныя праграмы: «Фальклор», «Тураўская легенда», «Полацкі сшытак», «Бывай, ХХ стагоддзе!», «Беларусы» і іншыя. Кожны без выключэння нумар у рэпертуары «Харошак» — гэта яркі, непаўторны спектакль, напоўнены разнастайнай гамай пачуццяў, эмоцый і запалу.
Канцэртныя выступы ансамбля «Харошкі» — гэта сапраўднае свята высокага харэаграфічнага мастацтва, якое дорыць гледачам радасць, выдатны настрой, выклікае захапленне, зараджае пазітывам.